O pasado mércores 9 de marzo realizamos unha actividade especial en conmemoración do Día Internacional da Muller. Organizada polas traballadoras sociais, a actividade tratou sobre o papel da muller nas diferentes culturas, e como as desigualdades en comparación cos homes seguen afectando a moitas mulleres no mundo.
Nesta ocasión tamén quixemos centrar o debate na práctica da prostitución como forma de explotación sexual. Para iso, visualizamos unha entrevista realizada a Claudia Quintero, activista e defensora dos dereitos humanos, e directora da Corporación Anne Frank (organización comunitaria feminista). Nesta entrevista, a activista defende a necesidade de abolir a prostitución xa que é unha forma de explotación sexual e trata de persoas. Tras a súa visualización, usuarias e persoal debatiron sobre as implicacións da práctica da prostitución, e como afecta o modelo de sociedade patriarcal aos dereitos destas traballadoras sexuais. O debate resultou moi enriquecedor, porque aínda cunha diversidade de opinións, mantívose en todo momento un clima de entendemento e respecto mutuo.
Para rematar a actividade realizouse un xogo de traballo en equipo e pensamento lateral, no que, por parellas, as usuarias debían tentar liberarse da atadura sen desfacer os nós das cordas nos pulsos.
