Este luns, 14 usuarias da nosa entidade, acompañadas pola terapeuta ocupacional e tres voluntarias da Fundación MAPFRE, tiveron a oportunidade de gozar dunha divertida tarde de cine grazas á invitación realizada pola Fundación MAPFRE para asistir á estrea de O Diaño Viste de Prada 2.
Desde o momento en que chegamos ao cine, o ambiente foi de ilusión e ganas de pasar un bo rato xuntas. A película non defraudou e regalounos momentos de risas, sorpresas e moitos comentarios durante e despois da proxección. Algunhas das nosas usuarias xa coñecían a primeira película e estaban desexando descubrir que novas aventuras lles agardaban ás súas protagonistas, mentres que para outras foi unha historia completamente nova que tamén gozaron moito.
Como toda boa tarde de cine, non faltaron os imprescindibles: refrescos, flocos de millo e algún que outro doce para acompañar a sesión.
Ademais de gozar dunha película moi agardada, esta actividade permitiunos pasar tempo xuntas nun contorno diferente, fomentar as relacións sociais e crear novos recordos compartidos. Ao rematar, as conversacións sobre as escenas favoritas e os personaxes continuaron durante o camiño de volta, demostrando o moito que desfrutaran da experiencia.
Queremos agradecer á Fundación MAPFRE a súa invitación e, especialmente, ás voluntarias que nos acompañaron durante toda a actividade pola súa proximidade, amabilidade e disposición. Grazas a iniciativas coma esta, as nosas usuarias poden acceder a actividades de lecer inclusivo que enriquecen o seu día a día e lles permiten gozar de experiencias culturais e de participación na comunidade.
Pasámolo en grande e xa estamos desexando repetir! 🎬🍿🥤
