Despois do fin de semana, chegou o luns de véspera de festivo na nosa cidade, onde o noso fogar se vestiu de festa para celebrar a tradicional festividade de San Xoán, unha das celebracións máis arraigadas na nosa cultura.
Tanto usuarias como traballadoras participaron nas actividades que incluíron charla, churrasco, xogos de mesa, música, buscando unha forma de honrar a chegada do verán e a historia de San Xoán Bautista.
A mañá comezou coa charla de Orgullo Galego, unha plataforma dixital que promove a cultura e a lingua galega, facendo charlas de divulgación sobre tradicións e días celebrados e sinalados como importantes na comunidade de Galicia.
Continuamos a mañá, coa elaboración do noso cubo con auga e as herbas típicas de San Xoán que previamente nos citou Borxa de Orgullo Galego na charla. Mentres, a traballadora social foi a encargada do asado da carne na nosa terraza, mentres as usuarias se refrescaban con algúns xogos de auga.
Chegou a hora da comida, onde nos sentamos á mesa tanto traballadoras como usuarias para gozar do asado, aproveitamos a ocasión para celebrar o aniversario do noso cociñeiro durante o postre. Ao rematar a comida, trasladámonos de novo á terraza, á sombra da nosa sombrilla, a xogar ao bingo con premios incluídos.
Sobre as 19:30 horas, 4 usuarias e 2 educadoras desprazáronse ao meollo da festa, nas praias de Orzán e Riazor, para contemplar as fogueiras, a música dos bares, cear nos postos da rúa e, finalmente, ás 00:00 horas, ver a queima da falla e os fogos artificiais. Sen dúbida, San Xoán volveu a demostrar ser unha data especial para fortalecer os lazos comunitarios e manter vivas as nosas tradicións.
